नाशिक विभाग पदवीधर मतदार संघातून १६ उमेदवार रिंगणात : ६ उमेदवारांची माघार

नाशिक,दि.१६ जानेवारी,२०२३ – नाशिक विभाग पदवीधर मतदार संघ निवडणुकीच्या उमेदवारी अर्ज मागे घेण्याच्या शेवटच्या दिवशी ६ उमेदवारांनी अर्ज मागे घेतले असून १६ उमेदवार निवडणुकीच्या रिंगणात आहेत, अशी माहिती सहा.निवडणूक निर्णय अधिकारी नाशिक विभाग पदवीधर मतदार संघ तथा उपायुक्त (सा.प्र.) रमेश काळे यांनी दिली आहे.

नाशिक पदवीधर निवडणुकीचे चित्र काही अंशी स्पष्ट झाले असून फडणवीसांच्या भेटीला गेलेले धनराज विसपुते यांनी शेवटच्या काही मिनिटात माघार घेत असल्याचे जाहीर केले.अर्ज भरण्याच्या दिवसापासून ते अर्ज माघारीच्या शेवटच्या मिनिटापर्यंत रंगत दिसून आली.अमोल बाळासाहेब खाडे, डॉ.सुधीर सुरेश तांबे, दादासाहेब हिरामण पवार, धंजनय क्रिष्णा जाधव, राजेंद्र दौलत निकम, धनराज देविदास विसपुते या ६ उमेदवारांनी पदवीधर मतदार संघ निवडणुकीतून माघार घेतली आहे. त्यामुळे आता नाशिक पदवीधर निवडणुकीत आता १६ उमेदवार रिंगणात नशीब अजमावणार आहेत. मात्र सत्यजित तांबे, शुभांगी पाटील, ऍड. सुभाष जंगले यांच्यात खरी लढत होण्याची शक्यता आहे.

काँग्रेस पक्षाची अधिकृत उमेदवारी असतानाही तत्कालीन आमदार सुधीर तांबे यांनी कुटुंबाच्या आग्रहाचे कारण पुढे करून भाजपच्या संपर्कात असलेल्या पुत्र सत्यजित तांबे यांचा अपक्ष काँग्रेस पक्षाकडून उमेदवारी अर्ज दाखल केला. मात्र काँग्रेस पक्षाने पक्षभंगाची कारवाई केल्याने ते अपक्ष म्हणून रिंगणात आले. भाजपने देखील ऐनवेळी पर्यंत इच्छुक असलेल्या शुभांगी पाटील यांना वेटिंगवर ठेवत अधिकृत उमेदवारी जाहीर केली नाही. त्यांनी देखील अपक्ष फॉर्म रिंगणात उतरल्या. त्यामुळे या निवडणुकीकडे संपूर्ण राज्याचे लक्ष केंद्रित झाले आहे. दरम्यान आज माघारीच्या शेवटच्या दिवशी २२ पैकी ६ उमेदवारांनी माघार घेतली. दुपारी ३ वाजेपर्यंत अखेरच्या वेळी काहीतरी नाट्यमय घडामोडी घडतील निवडणूक एकतर्फी होईल, अशी शक्यता असताना मात्र आता सत्यजित तांबे, शुभांगी पाटील, ऍड. सुभाष जंगले यांच्यात खरी लढत नाशिक पदवीधर मतदारसंघात पाहायला मिळण्याची शक्यता आहे.

हे आहेत १६ उमेदवार
रतन कचरु बनसोडे, नाशिक वंचित बहुजन आघाडी, सुरेश भिमराव पवार, नाशिक नॅशनल ब्लॅक पँथर पार्टी, अनिल शांताराम तेजा, अपक्ष, अन्सारी रईस अहमद अब्दुल कादीर,धुळे अपक्ष, अविनाश महादू माळी, नंदूरबार अपक्ष, इरफान मो इसहाक, मालेगाव जि.नाशिक अपक्ष, ईश्वर उखा पाटील,धुळे अपक्ष, बाळासाहेब रामनाथ घोरपडे, नाशिक, अपक्ष, ॲड. जुबेर नासिर शेख,धुळे अपक्ष, ॲड.सुभाष राजाराम जंगले,श्रीरामपुर, अपक्ष, सत्यजित सुधीर तांबे,संगमनेर, अपक्ष, नितीन नारायण सरोदे, नाशिक अपक्ष, पोपट सिताराम बनकर, अहमदनगर, अपक्ष, शुभांगी भास्कर पाटील,धुळे अपक्ष, सुभाष निवृत्ती चिंधे, अहमदनगर, अपक्ष, संजय एकनाथ माळी,जळगाव,अपक्ष असे एकूण १६ उमेदवार निवडणुक लढविणार आहेत.

नाशिक विभाग पदवीधर मतदार संघ निवडणुकीचे निवडणूक निरीक्षक म्हणून डॉ.निपुण विनायक, भा.प्र.से. यांची नियुक्ती करण्यात आली आहे. निवडणुकीसंदर्भात काही तक्रार असल्यास डॉ. निपुण विनायक यांच्याशी संपर्क साधावा त्यांचा भ्रमणध्वनी क्रमांक 9834874768 असा आहे.