नाशिक, दि. १८ ऑगस्ट २०२५ – CREDAI Nashik Property Expo क्रेडाई नाशिक मेट्रोतर्फे आयोजित “नम: नाशिक” या भव्य प्रॉपर्टी प्रदर्शनाचा समारोप मोठ्या उत्साहात झाला. पाच दिवस चाललेल्या या प्रदर्शनामुळे तब्बल १०० कोटींची उलाढाल झाली असून अनेकांसाठी हे गृहस्वप्नपूर्तीचे व्यासपीठ ठरल्याचे प्रतिपादन महाराष्ट्राचे शालेय शिक्षण मंत्री दादासाहेब भुसे यांनी समारोप सोहळ्यात केले.शहराच्या मध्यवर्ती ठिकाणी ठक्कर डोम येथे भरलेल्या या गृहप्रदर्शनाला नाशिकसह उत्तर महाराष्ट्र आणि राज्यातील विविध भागांतून नागरिकांनी उत्स्फूर्त प्रतिसाद दिला.
कुंभमेळ्याच्या पार्श्वभूमीवर विकासाला गती (CREDAI Nashik Property Expo)
भुसे म्हणाले की, “नाशिकला निसर्गाने भरभरून दिले आहे. आगामी दोन वर्षांत कुंभमेळा होणार असून या काळात नाशिकला आंतरराष्ट्रीय स्तरावर नवी ओळख मिळेल. शिक्षण हब म्हणून शहराची ओळख दृढ व्हावी, यासाठी सर्वांनी एकत्रित प्रयत्न करावेत.”
बांधकाम क्षेत्राचा रोजगार व अर्थकारणाला हातभार
मानद सचिव तुषार संकलेचा यांनी स्वागतपर भाषणात सांगितले की, “बांधकाम व्यवसायामुळे अनेकांना प्रत्यक्ष-अप्रत्यक्ष रोजगाराच्या संधी उपलब्ध होतात. क्रेडाई सदस्य बांधकाम व्यावसायिक म्हणजे विश्वासार्ह व्यवहार अशी प्रतिमा तयार झाली आहे. या प्रदर्शनाला मिळालेला उत्स्फूर्त प्रतिसाद याचीच पावती आहे.”
म्हाडाकडून सकारात्मक सहकार्य
म्हाडा अध्यक्ष रंजन ठाकरे यांनी सर्वांसाठी परवडणारी घरे या केंद्र शासनाच्या उद्दिष्टावर भर दिला. नियमांमधील त्रुटी दूर करून म्हाडा कडून सकारात्मक सहकार्य मिळेल, असे त्यांनी स्पष्ट केले.
नाशिकचे ब्रॅण्डिंग आणि ग्राहकांचा कल
क्रेडाई नाशिक मेट्रोचे अध्यक्ष गौरव ठक्कर म्हणाले, “हे गृहप्रदर्शन आंतरराष्ट्रीय दर्जाचे ठरले आहे. मोठी घरे, टाउनशिप, अॅमिनीटीज, बंगलो, फार्म हाऊस, प्लॉट्स, ऑफिसेस व शॉप्स याबद्दल नागरिकांचा कल दिसून आला. परवडणाऱ्या घरांसाठी म्हाडाचा सहभाग महत्त्वाचा ठरला.”
१०० हून अधिक स्पॉट बुकिंग
समन्वयक नरेंद्र कुलकर्णी यांनी सांगितले की, “प्रदर्शनादरम्यान ५० हून अधिक फ्लॅट्स व ५० हून अधिक प्लॉट्सचे स्पॉट बुकिंग झाले. स्पॉट बुकिंग करणाऱ्यांना चांदीचा शिक्का भेट देण्यात आला. आगामी सणासुदीच्या काळात आणखी बुकिंग होणार आहेत.”नाशिकमधील औद्योगिक, शैक्षणिक, धार्मिक व कृषीपूरक क्षेत्रांमुळे येथील रिअल इस्टेट गुंतवणुकीसाठी पोषक वातावरण असल्याचेही त्यांनी नमूद केले.
ग्रीन कुंभवर चर्चासत्र
प्रदर्शनादरम्यान ग्रीन कुंभ या विषयावर विशेष चर्चासत्र आयोजित करण्यात आले. विविध तज्ञांनी पर्यावरणपूरक कुंभमेळ्याबाबत मार्गदर्शन केले.
उत्तम स्टॉलसाठी पुरस्कार
प्रथम : वास्तू ग्रुप
द्वितीय : ठक्कर ग्रुप लिमिटेड
तृतीय : कन्स्ट्रुवेल प्रा. लि.
चतुर्थ : स्पॅन कन्स्ट्रक्शन
प्रायोजकत्व व सहकार्य
या प्रदर्शनाचे मुख्य प्रायोजक दिपक बिल्डर्स अँड डेव्हलपर्स होते. तर ललित रुंगटा ग्रुप आणि रवी महाजन बिल्डर्स अँड डेव्हलपर्स यांनी सहकार्य केले.क्रेडाई नाशिक मेट्रोचे कोषाध्यक्ष श्रेणिक सुराणा, सहसचिव सचिन बागड, हंसराज देशमुख, मॅनेजिंग कमिटी सदस्य श्यामकुमार साबळे , अनंत ठाकरे, विजय चव्हाणके, सागर शाह, निशित अटल, सुशील बागड, निरंजन शाह, वृषाली हिरे, दीपाली बीरारी, सहयोगी सदस्य सतीश मोरे,सुशांत गांगुर्डे, अभिषेक महाजन,समीर सोनवणे, मनोज लाडानी, हर्षल हणमंते, भूषण कोठावदे, शिवम पटेल, हिरेन भडजा, मयुरेश चौधरी, ऋषभ तोडरवाल, क्रेडाई युवा विग समन्वयक आदित्य भातंबरेकर , सह समन्वयक अजिंक्य नाहर यांनी विशेष परिश्रम घेतले .तसेच संपूर्ण आयोजन समितीच्या सदस्यांच्या अथक प्रयत्नामुळे हे प्रदर्शन यशस्वी झाले.
