करुणा मुंडेंचा हनी ट्रॅप प्रकरणावर गौप्यस्फोट

मुंबई, २२ जुलै २०२५ – Karuna Munde Press Conference राज्याच्या राजकारणात आधीच नाशिकमधील हनी ट्रॅप प्रकरणाने खळबळ उडवलेली असताना आता ठाण्यातील महिला होमगार्डने दोन एसीपी दर्जाच्या अधिकाऱ्यांवर लैंगिक अत्याचाराचे आरोप केल्याने खळबळ उडाली आहे. स्वराज्य पक्षाच्या नेत्या करुणा मुंडे यांनी पीडित महिलेसोबत थेट पत्रकार परिषद घेत या संपूर्ण प्रकरणाचा थरारक गौप्यस्फोट केला आहे.

“हा हनी ट्रॅप नाही, हे लैंगिक अत्याचाराचं प्रकरण आहे” – करुणा मुंडे (Karuna Munde Press Conference)
करुणा मुंडे म्हणाल्या, “या महिलेला ‘हनी ट्रॅप’ म्हणून बदनाम केलं जात आहे. वास्तविकता अशी आहे की दोन वरिष्ठ पोलीस अधिकाऱ्यांनी तिच्यावर जबरदस्ती केली असून, तिच्या तक्रारीची दखलही घेतली गेली नाही. उलट तिच्यावरच खोट्या खंडणीच्या गुन्ह्याचा आरोप लावण्यात आला.”

पीडितेचे थेट आरोप – गुंगीचं औषध पाजून बलात्कार
पत्रकार परिषदेत पीडित महिलेने थेट कळवा पोलीस ठाण्यातील एसीपी अधिकाऱ्याचा फोटो दाखवत सांगितलं की, “एका जिममध्ये त्यांची ओळख झाली. माझा मोबाईल नंबर घेतला आणि नंतर सतत मेसेज करत राहिला. एके दिवशी चहा प्यायला घरी बोलावलं, आणि फोनवर पत्नीशी बोलत असल्याचा आभास निर्माण केला. मात्र, घरी गेल्यावर पाण्यात गुंगीचं औषध टाकून त्याने आणि दुसऱ्या पोलीस अधिकाऱ्याने माझ्यावर बलात्कार केला.”

“तक्रार केली पण पोलिसांनीच धमकावलं”
महिलेच्या म्हणण्यानुसार, कळवा पोलीस ठाण्यात तक्रार दाखल करताच ती नाकारण्यात आली, आणि वरिष्ठांकडे गेल्यावरही कोणतीही मदत मिळाली नाही. पोलीस महासंचालक, मुख्यमंत्री, उपमुख्यमंत्री आणि महिला आयोगाकडे तक्रार केल्यानंतरही पोलीस प्रशासनाने तिच्यावर दबाव टाकला आणि धमकावलं, असा गंभीर आरोप तिने केला आहे.

“माझ्याकडे पुरावे आहेत – पेन ड्राईव्हमध्ये व्हिडिओ, चॅट, कॉल्स”
पीडितेने सांगितले की, तिच्याकडे व्हिडिओ, मेसेजेस आणि कॉल रेकॉर्डिंगसह सर्व पुरावे एका पेन ड्राईव्हमध्ये आहेत. तरीसुद्धा कुणीही चौकशी करण्यास तयार नाही कारण आरोपी वरिष्ठ दर्जाचे पोलीस अधिकारी आहेत.

करुणा मुंडे यांचा इशारा – “८ दिवसांत गुन्हा दाखल झाला नाही तर आंदोलन!”
करुणा मुंडे यांनी पत्रकार परिषदेत स्पष्टपणे सांगितले, “८ दिवसांत गुन्हा दाखल झाला नाही, तर मी थेट डीसीपी ऑफिससमोर आंदोलन करणार. हा न्यायाचा प्रश्न आहे. महिलांना हनी ट्रॅपचं नाव लावून दुर्लक्षित करणं योग्य नाही. ही महिला गेल्या सहा महिन्यांपासून न्यायासाठी दरवाजे ठोठावत आहे.”

संपूर्ण प्रकरणावर वाढलेला दबाव
या प्रकरणामुळे राज्य सरकार, गृहविभाग आणि पोलीस खात्यांवर दबाव वाढला आहे. हनी ट्रॅपच्या नावाने सुरु झालेल्या या प्रकरणात आता लैंगिक शोषणाची गंभीर बाजू समोर येत असल्याने प्रशासकीय यंत्रणा अडचणीत सापडली आहे.

हनी ट्रॅप की बलात्कार?
हे प्रकरण हनी ट्रॅप आहे की वास्तविक लैंगिक अत्याचार – याचा निर्णय चौकशी अंती लागेल. मात्र करुणा मुंडे यांनी उघडपणे पीडितेची बाजू घेत राज्य सरकारवर तत्काळ कारवाईसाठी दबाव टाकला आहे.