मुंबई, दि. १२ ऑगस्ट २०२५ – Kishor Kadam home issue मराठी आणि हिंदी चित्रपटसृष्टीतील बहुआयामी अभिनेते व कवी सौमित्र (किशोर कदम) सध्या गंभीर संकटात सापडले आहेत. अंधेरी (पूर्व) येथील चकाला परिसरातील हवा महल सोसायटीच्या पुनर्विकास प्रक्रियेत गंभीर अनियमितता व भ्रष्टाचार झाल्याचा आरोप त्यांनी केला आहे. या प्रकरणामुळे त्यांचे आणि इतर २३ सभासदांचे घर धोक्यात आले असून, त्यांनी फेसबुकवरून मुख्यमंत्री देवेंद्र फडणवीस, उपमुख्यमंत्री एकनाथ शिंदे व अजित पवार तसेच सहकार मंत्री बाबासाहेब पाटील यांना तातडीने हस्तक्षेप करण्याचे आवाहन केले आहे.
काय आहे प्रकरण ?(Kishor Kadam home issue)
किशोर कदम यांच्या मते, सोसायटी कमिटीने प्रोजेक्ट मॅनेजमेंट कन्सल्टंट (PMC) आणि बिल्डर यांच्या संगनमताने सदस्यांना योग्य माहिती न देता महत्त्वाचे निर्णय घेतले. आरोपानुसार, चकाला सारख्या प्राइम लोकेशनमधील इमारतीला DCPR 33(11) व 33(12)B अंतर्गत SRA (Slum Rehabilitation Authority) योजनेत समाविष्ट करण्याचा निर्णय घेण्यात आला. हा निर्णय बहुसंख्य सदस्यांच्या संमतीच्या नावाखाली घेतला गेला, मात्र प्रत्यक्षात अनेक सभासदांना याची माहितीच नव्हती.
किशोर कदम यांनी नमूद केले की, ही योजना लागू झाल्यास रहिवाशांना ट्रान्झिट कॅम्पमध्ये हलवले जाईल आणि अनेक वर्षे त्यांच्या घराचा प्रश्न अनिश्चित राहू शकतो. “मी आयुष्यभर मेहनत करून, हप्ते भरून हे घर मिळवलं आहे. आता भ्रष्टाचारामुळे हे घर गमवावं लागू नये,” असे त्यांनी भावनिक शब्दांत म्हटले आहे.
कमिटी आणि बिल्डरवर गंभीर आरोप
कदम यांनी कमिटीवर आरोप केला की, जे सभासद प्रश्न विचारतात किंवा चुकीकडे लक्ष वेधतात, त्यांना व्हॉट्सअॅप ग्रुपमधून बाहेर काढले जाते, महत्त्वाची कागदपत्रे लपवली जातात आणि त्यांच्याविरुद्ध नकारात्मक वातावरण तयार केले जाते. त्यांनी या प्रकाराला “शहरी अत्याचार” (Urban Atrocity) असे संबोधले असून, अशा घटनांवर कायद्यात स्पष्ट तरतूद नसल्याची खंत व्यक्त केली.
त्यांनी सरकारच्या बहुमताच्या कायद्यावरही टीका केली, कारण त्याचा गैरफायदा घेऊन जागरूक सदस्यांचा आवाज दाबला जातो. “मूर्खांच्या बहुमतामुळे स्वतःच्या पायावर धोंडा पाडून घेणाऱ्यांना याची जाणीव होत नाही,” असे ते म्हणाले.
सोशल मीडियावर पाठिंबा
किशोर कदम यांच्या पोस्टनंतर सोशल मीडियावर मोठी चर्चा रंगली आहे. अनेक चाहत्यांनी, सहकाऱ्यांनी आणि सामान्य नागरिकांनी त्यांना पाठिंबा दर्शवला आहे. “सरकारने तातडीने हस्तक्षेप करून या अन्यायाला आळा घालावा,” अशी मागणी होत आहे.
कलावंताची कारकीर्द
किशोर कदम यांनी ‘नटरंग’, ‘जोगवा’, ‘फॅन्ड्री’, ‘जारण’ यांसारख्या चित्रपटांत उत्कृष्ट भूमिका साकारल्या आहेत. नुकत्याच प्रदर्शित झालेल्या ‘अंधार माया’ या वेब सीरिजमध्येही त्यांचा अभिनय चर्चेत आहे. कवी सौमित्र म्हणून त्यांनी मराठी साहित्य विश्वातही ठसा उमटवला आहे.
सरकारकडे अपेक्षा
किशोर कदम यांनी आपल्या पोस्टच्या शेवटी स्पष्ट केले की, हा प्रश्न केवळ त्यांच्या घराचा नाही तर अशा प्रकारे फसवले गेलेल्या अनेक मुंबईकरांचा आहे. त्यांनी मुख्यमंत्री, उपमुख्यमंत्री आणि सहकारमंत्री यांना तातडीने लक्ष देऊन पुनर्विकास प्रक्रिया थांबवण्याची मागणी केली आहे.
