ठाणे, दि. २२ सप्टेंबर २०२५ – Mumbai Thane Metro 4 मुंबई व ठाण्यातील वाढत्या वाहतूक कोंडीला मोठा दिलासा देणारा मेट्रो मार्ग ४ (वडाळा–कासारवडवली) आणि मेट्रो मार्ग ४ अ (कासारवडवली–गायमुख) या प्रकल्पाच्या टप्पा-१ ची तांत्रिक तपासणी व धाव चाचणी यशस्वीरीत्या पार पडली आहे. मुख्यमंत्री देवेंद्र फडणवीस यांच्या हस्ते या चाचणीला सुरुवात झाली. त्यांनी जाहीर केले की २०२६ च्या ऑक्टोबरपर्यंत या मेट्रोचे सर्व टप्पे प्रवाशांसाठी खुले केले जातील.
देशातील सर्वात मोठी मेट्रो मार्गिका(Mumbai Thane Metro 4)
मेट्रो ४, ४ अ आणि पुढे मेट्रो ११ (वडाळा–छत्रपती शिवाजी महाराज टर्मिनस) या मार्गिकांना जोडल्याने एकूण ५८ किलोमीटर लांबीची देशातील सर्वात मोठी मेट्रो मार्गिका तयार होणार आहे. या मार्गावरून दैनंदिन १३ लाखांहून अधिक प्रवासी प्रवास करतील, असा अंदाज वर्तवला जात आहे.
वाहतूक कोंडीला मोठा दिलासा
मुख्यमंत्री फडणवीस म्हणाले की, घाटकोपर-मुलुंड-गायमुख या मार्गिकेची एकूण लांबी ३५ किमी असून ३२ स्थानकांचा यात समावेश आहे. १६ हजार कोटी रुपयांच्या खर्चाने उभारल्या जाणाऱ्या या मेट्रो मार्गामुळे पूर्व-पश्चिम उपनगरे, ठाणे शहर आणि मुंबई शहर यांच्यातील प्रवास सुलभ होईल.
उपमुख्यमंत्री तथा एमएमआरडीए अध्यक्ष एकनाथ शिंदे यांनी सांगितले की, ५८ किमी लांबीचा हा प्रकल्प भारतातील पहिला संपूर्ण एलिव्हेटेड मेट्रो प्रकल्प ठरणार असून ठाणे-मुंबईतील वाहतूक कोंडीचा प्रश्न यातून मोठ्या प्रमाणात सुटणार आहे.
तांत्रिक चाचणी आणि सुरक्षा
कमिशनर ऑफ मेट्रो रेल सेफ्टी (CMRS) यांच्या मार्गदर्शनाखाली या प्राधान्य विभागातील सर्व तांत्रिक चाचण्या पूर्ण झाल्या. उड्डाणपूल, ट्रॅक, ओव्हरहेड इक्विपमेंट (OHE) यांसह सर्व महत्त्वाच्या सुविधांची तपासणी करण्यात आली. ट्रेन धाव चाचणी दरम्यान सॉफ्टवेअर कॉन्फिगरेशन, लोड कॅल्क्युलेशन आणि सुरक्षा मानकांचे पालन याची खात्री करण्यात आली.
आधुनिक मेट्रो ट्रेनची वैशिष्ट्ये
बीईएमएल निर्मित ६ डब्यांचे ट्रेन सेट्स
ट्रेन कंट्रोल अँड मॅनेजमेंट सिस्टम
प्रवासी आपत्कालीन संपर्क यंत्रणा
स्वयंचलित अग्निशमन शोध प्रणाली
अडथळा शोध उपकरण
ऊर्जा बचत करणारी पुनरुत्पादक ब्रेकिंग प्रणाली (३०% बचत)
ऑन-बोर्ड सार्वजनिक उद्घोषणा व माहिती प्रणाली
या सर्व सुविधा प्रवाशांच्या सुरक्षितता व सोयीसाठी अत्याधुनिक पद्धतीने बसवण्यात आल्या आहेत.
२०२६ अखेरपर्यंत ठाणे व मुंबईतील नागरिकांसाठी मेट्रोचे सर्व टप्पे खुले झाल्यानंतर प्रवासाचा वेळ लक्षणीयरीत्या कमी होईल. यामुळे रस्त्यावरील गर्दी कमी होऊन पर्यावरणपूरक, सुरक्षित आणि जलद वाहतूक व्यवस्थेचा लाभ सर्वसामान्यांना मिळणार आहे. ठाणे-मुंबईकरांच्या जीवनशैलीत बदल घडवणारा हा मेट्रो प्रकल्प भविष्यातील विकासासाठी एक महत्त्वाचा टप्पा ठरणार आहे.
