Nashik : २० ते २५ जून दरम्यान रंगणार ‘जनस्थान’ फेस्टिव्हल 

नाशिक – नाशिकच्या सांस्कृतिक जीवनात आधुनिक साधनांच्या उपयोगाने नवीन पर्व सुरु करणाऱ्या ‘जनस्थान’ या व्हाट्सअप ग्रुपचा आठवा वर्धापन दिन दिनांक २० जून ते २५ यादरम्यान नाशिकमध्ये साजरा होत असून महोत्सवाच्या तयारीला वेग आला आहे.

नाशिक ही सांस्कृतिक भूमी म्हणून ओळखली जाते. पं.विष्णू दिगंबर पलुस्कर, दादासाहेब फाळके, स्वातंत्र्यवीर सावरकर, कुसुमाग्रज, कानेटकर, बाबूराव बागुल यांच्यासारखे एक ना अनेक देदीप्यमान तारे नाशिकच्या नभांगणात चमकले. त्यांचीच परंपरा वेगवेगळ्या माध्यमातून पुढे नेणारे कलावंत आजही नाशिकचे नाव भारतीय पातळीवर नेत आहेत. या सगळ्यांचा एकत्रित असणारा ‘जनस्थान’ हा व्हाट्सअप ग्रुप दरवर्षी आपला वर्धापनदिन अनोख्या पद्धतीने साजरा करतो. यंदाही हा पाच दिवस चालणारा उत्सव नाशिकमध्ये साजरा होत असून चित्र – शिल्प प्रदर्शन, आयकॉन पुरस्कार सोहळा, गायन,नृत्य असा भरगच्च कार्यक्रम होणार आहे.

या सोहळ्यासाठी मान्यवर प्रमुख पाहुणे येणार असून त्यांच्या ज्ञानाचा अनुभव या महोत्सवाद्वारे नाशिककरांना घेता येईल. ग्रुपमध्ये असलेल्या चित्रकार आणि शिल्पकार यांचे प्रदर्शन कुसुमाग्रज स्मारकामध्ये कुसुमाग्रज प्रतिष्ठानच्या सहकार्याने दोन दिवस भरणार असून या सर्व महोत्सवाचे सूत्र ‘पंचतत्व’ या विषयावर आधारित आहे. प्रदर्शनातील चित्राकृती देखील याच विषयावर असून शिल्पकार दोन दिवस प्रत्यक्ष शिल्प निर्मिती करून दाखवणार आहेत. यामुळे नव्या पिढीबरोबरच नवे काही करू इच्छिणार्‍यांना एक वेगळा आनंद मिळेल.

याबरोबरच नाशिकमधील कवी ‘पंचतत्व’ हा विषय घेऊन स्वतंत्रपणे कविता लेखन करीत असून त्याला ग्रुपमधील संगीततज्ज्ञ संगीत साज चढवीत आहेत.तसेच जनस्थान मधील कलावंतांच्या अनोख्या नृत्याच्या कार्यक्रमाने जनस्थान फेस्टिवलची सांगता होईल लवकरच तीन जनस्थान आयकॉन पुरस्कार घोषित करण्यात येणार आहेत. त्यामुळे या अनोख्या महोत्सवाचा नाशिककरांनी आनंद घ्यावा असे आवाहन ग्रुपचे प्रमुख अभय ओझरकर यांनी केले आहे.