Nashik : तीनचाकी वाहनांसाठी MH-15-JA नवीन मालिका सुरू

नाशिक, १२ऑक्टोबर,२०२२ –नाशिक, प्रादेशिक परिवहन कार्यालय येथे तीनचाकी वाहनांसाठी ‘MH-15-JA’ ही नवीन मालिका सुरू करण्यात येत आहे. आकर्षक व पसंतीच्या नोंदणी क्रमांकासाठी गुरूवार दि. १३ ऑक्टोबर, २०२२ रोजी सकाळी १०.३० ते २.३० या वेळेत इच्छुकांनी अर्ज सादर करावेत, असे आवाहन प्रादेशिक परिवहन अधिकारी प्रदीप शिंदे यांनी केले आहे.

तीनचाकी वाहनांसाठी ‘MH-15-JA’ ही नवीन मालिकेच्या राखीव आकर्षक नोंदणी क्रमांकांसाठी शासन नियमानुसार ठराविक शुल्क विहित करण्यात आले आहे. याअनुषंगाने इच्छुकांनी विहीत नमुन्यातील अर्ज दि. १३ ऑक्टोबर रोजी दिलेल्या वेळेत कार्यालयात जमा करणे अनिवार्य असेल. अर्जा सोबत पत्‍त्याचा पुरावा, आधारकार्ड, वीज बील, घरपट्टी यापैकी एक तसेच अर्जदाराचे फोटो, आधारकार्ड किंवा निवडणूक आयोगाचे ओळखपत्र, पासपोर्ट, पॅनकार्ड यापैकी एक साक्षांकित प्रत तसेच आधारलिंक मोबाईल क्रमांक सादर करणे आवश्यक आहे. पसंतीच्या नोंदणी क्रमांकासाठी शुल्काची रक्कम कोणत्याही राष्ट्रीयकृत बँकेचा किंवा शेड्युल्ड बँकेचा डिमांड ड्राफ्टद्वारे प्रादेशिक परिवहन अधिकारी, नाशिक (R.T.O. NASHIK) यांच्या नावे भरणे आवश्यक आहे.

अर्जदराने एकदा राखून ठेवलेला पसंती क्रमांक दुसऱ्या व्यक्ती संस्थेच्या नावे हस्तांतरीत होणार नाही व कोणत्याही परिस्थतीत बदलून किंवा रद्द करता येणार नाही. एकाच क्रमांकासाठी एकापेक्षा अधिक अर्ज आल्यास अशा आकर्षक क्रमांकांची यादी कार्यालयातील नोटीस बोर्डावर त्याच दिवशी प्रदर्शित करण्यात येईल. याबाबतच्या अधिक माहितीसाठी प्रादेशिक परिवहन कार्यालय, नाशिक येथे संपर्क साधावा, असेही प्रादेशिक परिवहन अधिकारी श्री शिंदे यांनी कळविले आहे.