नाशिक- भविष्याचा वेध घेणाऱ्या तसेच नवोदित उद्योजकांच्या नाविन्यपूर्ण कलाविष्काराला प्रोत्साहन देणारे अंबड इंडस्ट्रीज अँड मॅन्युफॅक्चरर्स असोसिएशन (आयमा)तर्फे डोंगरे वसतिगृह मैदानावर आयोजित आयमा इंडेक्स २०२२ हे चार दिवसांचे आंतरराष्ट्रीय प्रदर्शन उद्या शुक्रवार दि.१८ मार्चपासून जनतेसाठी बघण्यास खुले होणार आहे.जास्तीत जास्त लोकांनी या प्रदर्शनास भेट देऊन उद्योजकांचा आनंद द्विगुणित करावा,असे आवाहन प्रदर्शनाचे चेअरमन धनंजय बेळे आणि संघटनेचे विद्यमान अध्यक्ष निखिल पांचाळ यांनी केले.
प्रदर्शनाचे उद्घाटन पालकमंत्री छगन भुजबळ यांच्या हस्ते तसेच जिंदाल सॉचे अध्यक्ष दिनेशचन्द्र सिंह,महाराष्ट्र औद्योगिक विकास महामंडळाचे सह मुख्य कार्यकारी अधिकारी अजित पाटील,ग्रीनबेस आणि हिरानंदानी ग्रुपचे मुख्य कार्यकारी अधिकारी श्रीधर नारायण,एचएएलचे मुख्य कार्यकारी अधिकारी डी.मैती आणि अन्य मान्यवरांच्या प्रमुख उपस्थितीत उद्या दि १८ मार्चला सकाळी १०.३० वाजता संपन्न होत आहे.
पर्यावरणपूरक आणि नाविन्यपूर्ण स्टॉल्स ही या प्रदर्शनाची खास वैशिष्ट्ये आहेत.उद्योग क्षेत्रात पाऊल टाकून आपली उन्नती साधावी आणि देशाला परकीय चलन मिळवून द्यावे अशी उदयोन्मुख उद्योजकांची मनिषा असते.मात्र त्यांना त्याबाबत आवश्यक ते मार्गदर्शन आणि पाठबळ मिळत नसल्याने ते हताश होतात आणि आपले स्वप्न साकार होणार किंवा नाही याची चिंता त्यांना सतावत असते.परंतु उद्योगक्षेत्राशी संबंधित सर्व बडे अधिकारी चारही दिवस प्रदर्शनस्थळी हजर राहून उद्योजक आणि विशेषतः नवोदितांना मार्गदर्शन करणार आहेत.वित्तसहाय्य आणि सबसिडीबाबतही त्यांना बहुमूल्य माहिती यावेळी उपलब्ध होणार आहे.कोविडच्या काळात दीर्घकाळ उद्योग बंद राहिल्याने अनेक छोट्यामोठ्या उद्योजकांचे कंबरडे मोडले गेले आहे.त्यांच्याबाबतही प्रदर्शनात अधिकाऱ्यांबरोबर चर्चा करून तोडगा काढण्यासाठी आयमातर्फे प्रयत्न केले जाणार आहेत.प्रदर्शनात विविध विषयांवर चर्चासत्र आणि परिसंवादही होणार असून सर्वांसाठी एकप्रकारे ती मेजवानीच ठरणार आहे,असेही बेळे आणि पांचाळ यांनी सांगितले.
आयमाचे सहावे प्रदर्शन – अंबड इंडस्ट्रीज अँड मॅन्युफॅक्चरर्स असोसिएशन (आयमा) ही संपूर्ण जिल्ह्याच्या उद्योग क्षेत्राचे नेतृत्व करते.या संघटनेचे गेल्या तीस वर्षापासून उत्कृष्ट कार्य सुरू आहे.कामगारांचे हित जोपासण्याबरोबरच उद्योजकांना प्रोत्साहन देण्याचे काम संघटनेतर्फे केले जाते.या संघटनेला प्रतिष्ठा मिळवून देण्यात ज्या अनेकांचे मोलाचे योगदान राहिले त्यात माजी अध्यक्ष आणि इंडेक्स २०२२ औद्योगिक प्रदर्शनाचे चेअरमन धनंजय बेळे यांचा उल्लेख गौरवाने करावा लागेल.
आयमाच्या कार्यात धनंजय बेळे यांनी लक्ष घातल्यानंतर या संघटनेने उत्तुंग भरारी घेतली आहे.संघटनेने आतापर्यंत सामाजिक बांधिलकी जोपासत विविध उपक्रम राबविले आहेत कोविडच्या काळातही आयमाने कामगार उद्योजक तसेच सर्वसामान्य जनतेच्या हिताचे विविध उपक्रम राबवून इतरांपुढे आगळा आदर्श निर्माण केला आहे उद्योजकांना प्रोत्साहन मिळावे तसेच गुंतवणुकीला चालना मिळण्याच्या उद्देशाने सन २००५ पासून आयमातर्फे दर तीन वर्षांनी आंतरराष्ट्रीय औद्योगिक प्रदर्शन भरविले जाते.
यावर्षी डोंगरे वस्तीग्रह मैदानावर आयोजित आयमा इंडेक्स २०२२ आंतरराष्ट्रीय औद्योगिक प्रदर्शन हे सहावे प्रदर्शन आहे आतापर्यंतची सर्व प्रदर्शने धनंजय बेळे यांच्या नेतृत्वाखालीच यशस्वीपणे पार पडली आहेत आयमाचे जिल्ह्यात २५०० हून अधिक सदस्य असून जिल्ह्यात १६००० इंडस्ट्रीज आहेत. B2B अंतर्गत उद्योजकांना उद्योग सुरू करण्यास प्रोत्साहन देण्याचे काम संघटना यशस्वीपणे करीत आहे दरवर्षी उद्योजकांची अद्ययावत अशी डिरेक्टरीही आयमातर्फे दरवर्षी प्रकाशित केली जाते.
