भारतावर ट्रम्प यांचा टॅरिफ बॉम्ब : रशियन तेल खरेदीवरून अमेरिका आक्रमक

वॉशिंग्टन/नवी दिल्ली, दि. ६ ऑगस्ट २०२५ – Trump tariff on India रशियाकडून तेल खरेदी सुरू ठेवल्यामुळे चिडलेल्या अमेरिकेचे अध्यक्ष डोनाल्ड ट्रम्प यांनी भारतावर आणखी २५ टक्के टॅरिफ लादण्याचा निर्णय घेतला आहे. त्यामुळे एकूण टॅरिफ ५० टक्क्यांवर पोहोचली आहे. हा निर्णय २७ ऑगस्ट २०२५ पासून लागू होणार असून, भारत-अमेरिका व्यापार संबंधांवर मोठा परिणाम होण्याची शक्यता आहे.

Trump slaps additional 25 per cent tariff on Indian imports over Russian oil purchases

Read @ANI Story | https://t.co/JT3iuNvlFM#DonaldTrump #USA #India #Russia #Tariff pic.twitter.com/pRwwY9mvMd

— ANI Digital (@ani_digital) August 6, 2025

रशियाकडून तेल खरेदी महागात पडणार(Trump tariff on India)

भारताने युक्रेन युद्धानंतर रशियन तेल खरेदी सुरूच ठेवली. अमेरिकेने २०२२ मध्ये रशियन तेलावर बंदी घातलेली असतानाही भारताने आपल्या गरजांनुसार रशियाकडून तेल आयात सुरूच ठेवली. यामुळेच ट्रम्प प्रशासनाने भारतावर हा आर्थिक दबाव आणला आहे.

ट्रंप यांचा आदेश आणि अंमलबजावणीची वेळ

अध्यक्ष ट्रम्प यांनी या निर्णयावर स्वाक्षरी करून कार्यकारी आदेश जारी केला आहे. हा आदेश जारी झाल्यानंतर २१ दिवसांनी, म्हणजेच २७ ऑगस्टपासून तो प्रभावी होईल. १७ सप्टेंबरपूर्वी अमेरिकेत पोहोचणाऱ्या भारतीय मालाला टॅरिफ सवलत दिली जाईल, मात्र त्यानंतर सर्व वस्तूंवर ५० टक्के टॅरिफ लागू होणार आहे.

ट्रम्प यांचा पक्षपातीपणा?

आंतरराष्ट्रीय घडामोडींचे अभ्यासक डॉ. शैलेंद्र देवळाणकर म्हणतात, “ट्रम्प यांचा हा निर्णय एकतर्फी आणि पक्षपाती आहे. चीन आणि युरोपियन देश सुद्धा रशियाकडून मोठ्या प्रमाणात तेल घेत आहेत, मात्र त्यांच्यावर अशी कारवाई झालेली नाही. भारतावरच टार्गेट करणं हे राजकीय दबावाचं एक साधन आहे.”

कोणत्या वस्तूंवर होणार परिणाम?

भारतातून अमेरिका निर्यात होणाऱ्या यंत्रसामग्री, औषधे, कपडे, माहिती तंत्रज्ञानाशी संबंधित सेवा आणि ऑटो पार्ट्स यासारख्या महत्त्वाच्या उद्योगांवर याचा मोठा परिणाम होणार आहे. टॅरिफ वाढल्याने या वस्तू अमेरिकन बाजारात महाग होतील आणि त्यामुळे स्पर्धा टिकवणं कठीण जाईल.

व्यापारी समुदायात चिंता

भारतीय व्यापारी समुदायात या निर्णयामुळे अस्वस्थता पसरली आहे. फेडरेशन ऑफ इंडियन एक्सपोर्ट ऑर्गनायझेशन्स (FIEO) चे अध्यक्ष अशोक साहनी म्हणतात, “हा निर्णय भारतीय निर्यातीला मोठा धक्का आहे. आधीच महागाई, रुपयाची घसरण आणि जागतिक स्पर्धा वाढलेली असताना अशा टॅरिफमुळे स्पर्धात्मकता कमी होईल.”

भारत सरकारची प्रतिक्रिया काय?

भारत सरकारने अद्याप अधिकृत प्रतिक्रिया दिलेली नाही, मात्र परराष्ट्र मंत्रालयाकडून सांगण्यात आलं की, “भारत आपला ऊर्जा पुरवठा विविध देशांतून घेतो आणि त्यामध्ये राष्ट्रीय हितसंबंध लक्षात घेऊन निर्णय घेतले जातात. आम्ही अमेरिकेशी चर्चा करू.”

ट्रंप यांचा इशारा – इतर देशही टार्गेटवर

ट्रंप यांच्या आदेशात म्हटलं आहे की, “कोणताही देश जर थेट किंवा अप्रत्यक्षपणे रशियाकडून तेल खरेदी करत असेल, तर त्यांच्यावरही अशाच प्रकारची कारवाई केली जाईल.” यामुळे अनेक विकासशील देशांची चिंता वाढली आहे.

रशिया बदललं तर टॅरिफ बदलू शकतो

ट्रंप यांनी सूचित केलं आहे की, “रशिया जर आपल्या आक्रमक धोरणात बदल करेल, तर टॅरिफ पुन्हा कमी करण्याचा विचार केला जाईल. मात्र सध्या भारतावर हे शुल्क कायम असेल.”

या निर्णयामागे ट्रंप यांचा २०२४ च्या निवडणुकीनंतरचा आक्रमक परराष्ट्र धोरण स्पष्ट दिसत आहे. ते अमेरिका फर्स्ट या धोरणानुसार काम करत असून, रशियाविरोधातील आंतरराष्ट्रीय आघाडी मजबूत करत आहेत. भारतासाठी हा काळ अतिशय नाजूक असून, अमेरिका आणि रशिया या दोघांशी समतोल राखणे ही मोठी कसरत ठरणार आहे.

भारत-अमेरिका व्यापार संबंधांत नवीन तणाव निर्माण झाला आहे. ट्रंप यांचा टॅरिफ निर्णय भारतासाठी आव्हानात्मक आहे, विशेषतः तेव्हाच जेव्हा भारत ‘मेक इन इंडिया’ आणि ‘वोकल फॉर लोकल’ सारख्या मोहिमांद्वारे निर्यात वाढवण्याचा प्रयत्न करत आहे. येणाऱ्या काळात भारत सरकार या संकटावर काय तोडगा काढते, याकडे साऱ्या जगाचं लक्ष लागून राहील.