भारताचा “विराट”विजय : २० वर्षांनंतर न्यूझीलंडचा केला पराभव 

धर्मशाळा,दि. २२ ऑक्टोबर २०२३ –एकदिवसीय विश्वचषक २०२३ मध्ये न्यूझीलंडविरुद्ध भारतीय संघाची विजयी मालिका कायम राहिली. धरमशाला मैदानावर किवी संघासमोर २७४ धावांच्या धावसंख्येचा पाठलाग करण्यासाठी आलेल्या टीम इंडियाने ४८ षटकांत ६ गडी गमावून लक्ष्य गाठले. या सामन्यात पुन्हा एकदा चेस मास्टर विराट कोहलीची जादू पाहायला मिळाली, ज्याने ९५ धावांची शानदार मॅच-विनिंग इनिंग खेळून विजय पूर्णपणे निश्‍चित केला. टीम इंडिया आता १० गुणांसह पॉइंट टेबलमध्ये पहिल्या स्थानावर पोहोचली आहे.२००३ नंतर प्रथमच एकदिवसीय विश्वचषक स्पर्धेत न्यूझीलंडविरुद्ध विजय मिळवण्यात भारताला यश आले आहे.

या स्पर्धेतील २१ वा सामना भारत आणि न्यूझीलंड यांच्यात २२ ऑक्टोबर रोजी धर्मशाला येथे झाला.या रोमांचक सामन्यात टीम इंडियाने न्यूझीलंडविरुद्ध शानदार प्रदर्शन केले आणि २० वर्षांनंतर चार विकेट राखून विजय मिळवला. लक्ष्याचा पाठलाग करताना पुन्हा एकदा अनुभवी फलंदाज विराट कोहली जबरदस्त फॉर्ममध्ये दिसला. संघासाठी तिसऱ्या क्रमांकावर फलंदाजी करताना त्याने एकूण १०४ चेंडूंचा सामना केला.दरम्यान, विराटने  ९१.३४ च्या स्ट्राइक रेटने 95 धावा करण्यात यशस्वी झाला. यादरम्यान त्याच्या बॅटमधून आठ चौकार आणि दोन षटकार आले.

फर्ग्युसनने २ मोठे धक्के दिले, कोहलीने अय्यरसह डाव सांभाळला
भारतीय संघाला या सामन्यात पहिला झटका ७१ धावांच्या स्कोअरवर कर्णधार रोहित शर्माच्या रुपाने बसला जो ४६ च्या वैयक्तिक स्कोअरवर लॉकी फर्ग्युसनच्या गोलंदाजीवर आला. यानंतर ७६ धावांवर शुभमन गिलही २६ धावा करून फर्ग्युसनचा बळी ठरला. येथून विराट कोहली आणि श्रेयस अय्यरने मिळून डाव सांभाळला आणि धावांचा वेग कमी होऊ दिला नाही. दोघांमध्ये तिसऱ्या विकेटसाठी ४९ चेंडूत ५२ धावांची भागीदारी झाली.मात्र, श्रेयस अय्यर २९ चेंडूत ३३ धावा काढून ट्रेंट बोल्टचा बळी ठरला. या सामन्यात १२८ धावांवर टीम इंडियाला तिसरा धक्का बसला.

कोहलीने एक बाजू सांभाळली :,राहुल पाठोपाठ सूर्यकुमारही पॅव्हेलियन मध्ये परतले.
१२८ धावांवर तीन गडी गमावलेला भारतीय संघ अडचणीत सापडलेला दिसत होता. येथून विराट कोहलीसह लोकेश राहुलने धावा काढण्याची प्रक्रिया सुरू ठेवली त्यामुळे न्यूझीलंडचे गोलंदाज फारसे दडपण निर्माण करू शकले नाहीत. मात्र, १८२ धावांवर टीम इंडियाला चौथा धक्का लोकेश राहुलच्या रूपाने बसला, जो २७ च्या वैयक्तिक स्कोअरवर मिचेल सँटनरच्या चेंडूवर एलबीडब्ल्यू होऊन पॅव्हेलियन मध्ये परतला.यानंतर फलंदाजीला आलेल्या सूर्यकुमार यादवला फलंदाजीत विशेष काही करता आले नाही आणि तो २ धावांवर धावबाद झाला.

कोहलीच्या साथीने जडेजाने संघाला रोमहर्षक विजय मिळवून दिला
या सामन्यात टीम इंडियाने आपला निम्मा संघ १९१ धावांवर गमावला होता. यानंतर विराट कोहलीने रवींद्र जडेजासह डाव पुढे नेण्याची प्रक्रिया सुरू ठेवली. जडेजाने फलंदाजीत आक्रमक पध्दतीचा अवलंब केला आणि खराब चेंडूंवर चौकार चुकवला नाही, त्यामुळे विराट कोहलीवरही दबाव कमी झाला. कोहली आणि जडेजा यांच्यातील सहाव्या विकेटसाठी ८३ धावांची भागीदारी या सामन्यात टीम इंडियाच्या विजयात महत्त्वाची भूमिका बजावली.या सामन्यात विराट कोहली १०४ चेंडूत ९५ धावांची इनिंग खेळून बाद झाला. तर जडेजा शेवटपर्यंत नाबाद राहिला आणि ३९ धावांची इनिंग खेळून परतला आणि या सामन्यात टीम इंडियाला ४ विकेटने विजय मिळवून दिला. न्यूझीलंडकडून या सामन्यात लॉकी फर्ग्युसनने २ तर मिचेल सँटनर, मॅट हेन्री आणि ट्रेंट बोल्ट यांनी १-१ विकेट घेतली.