‘पुन्हा शिवाजीराजे भोसले’ ३१ ऑक्टोबरला प्रदर्शित होणार

मुंबई, दि. २ ऑक्टोबर २०२५ – Zee Studios Marathi movie “स्वराज्याचं रक्षण करायला राजे पुन्हा येत आहेत!” – या जोशपूर्ण घोषणेने महाराष्ट्रातील सिनेरसिकांच्या मनात अभिमानाची लहर उमटली आहे. सुप्रसिद्ध दिग्दर्शक महेश मांजरेकर लिखित-दिग्दर्शित ‘पुन्हा शिवाजीराजे भोसले’ हा बहुप्रतिक्षित चित्रपट येत्या ३१ ऑक्टोबर २०२५ रोजी संपूर्ण महाराष्ट्रभर प्रदर्शित होत आहे. या चित्रपटाचा नवीन टिझर नुकताच एका भव्य सोहळ्यात लॉन्च करण्यात आला असून, त्यातून उलगडलेले छत्रपती शिवाजी महाराजांचे अद्वितीय रूप प्रेक्षकांच्या अंगावर रोमांच उभे करणारे ठरले आहे.

आजच्या वास्तवाशी शिवाजी महाराजांचा संवाद(Zee Studios Marathi movie)

या सिनेमात केवळ ऐतिहासिक व्यक्तिमत्त्वाचा गौरव नाही, तर आधुनिक महाराष्ट्रासमोरील प्रश्नांवरही प्रखर भाष्य केलेले आहे. शेतकऱ्यांच्या आत्महत्या, मराठी माणसांचे मुंबईतील अस्तित्व, परप्रांतीयांची वाढती आक्रमकता, तसेच महाराष्ट्राच्या सांस्कृतिक अस्मितेचा प्रश्न – हे सर्व मुद्दे टिझरमधून अधोरेखित झाले आहेत. जणू आज महाराज प्रत्यक्ष हजर होऊन आपल्या काळातील अन्यायकारक परिस्थितीला आव्हान देत आहेत, अशी अनुभूती प्रेक्षकांना होते.

दमदार कलाकारांचा समावेश

या चित्रपटात सिद्धार्थ बोडके छत्रपती शिवाजी महाराजांची प्रमुख भूमिका साकारत आहेत. त्यांच्या सोबत विक्रम गायकवाड, शशांक शेंडे, मंगेश देसाई, पृथ्वीक प्रताप, रोहित माने आणि नित्यश्री अशी ताकदीची कलाकारांची फळी आहे. विशेष म्हणजे, राष्ट्रीय पुरस्कार विजेते बालकलाकार त्रिशा ठोसर आणि भार्गव जगताप यांच्या भूमिका देखील महत्त्वपूर्ण ठरणार आहेत.

कथा, पटकथा आणि संवाद

चित्रपटाची कथा व पटकथा स्वतः महेश मांजरेकर यांनी लिहिली आहे, तर संवादलेखन सिद्धार्थ साळवी यांनी केले आहे. निर्मिती राहुल पुराणिक आणि राहुल सुगंध यांनी केली असून झी स्टुडिओज या भव्य प्रकल्पाची प्रस्तुती करत आहे.

दिग्दर्शक महेश मांजरेकर यांची भूमिका

या निमित्ताने बोलताना दिग्दर्शक महेश मांजरेकर म्हणाले –

“हा सिनेमा माझ्या मनातील अस्वस्थतेचा आवाज आहे. शिवाजी महाराजांच्या विचारांनी केवळ स्वराज्य घडवले नाही, तर जनमानस जागृत केले. आजच्या महाराष्ट्राच्या समस्यांकडे पाहताना, महाराजांचे विचार आपल्याला दिशा देतात. हा चित्रपट इतिहास सांगणारा आहेच, पण त्याचबरोबर आजच्या वास्तवाशी संवाद साधणारा आहे. कलाकार म्हणून मी गप्प बसू शकत नाही, म्हणून हा प्रयत्न केलाय.”

झी स्टुडिओजचा अभिमान

झी स्टुडिओज मराठीचे व्यवसाय प्रमुख बवेश जानवलेकर यांनी सांगितले –

“‘पुन्हा शिवाजीराजे भोसले’ हा फक्त सिनेमा नसून महाराष्ट्राशी आणि त्याच्या संस्कृतीशी नव्याने नातं जोडणारा प्रवास आहे. या चित्रपटातून महाराज थेट बोलणार आहेत. त्यामुळे हा चित्रपट फक्त बघण्यासाठी नाही, तर आयुष्य जगण्याची प्रेरणा देणारा ठरेल.”

सिद्धार्थ बोडके यांची भावना

छत्रपती शिवाजी महाराजांची भूमिका मिळाल्याबाबत अभिनेता सिद्धार्थ बोडके म्हणाले –

“इतिहासातील इतक्या थोर व्यक्तिमत्त्वाची भूमिका साकारणं ही मोठी जबाबदारी आहे. महेश सरांनी माझ्यावर दाखवलेला विश्वास मी आयुष्यभर विसरणार नाही. या चित्रपटातील महाराज प्रखर संतप्त आहेत, कारण आजच्या महाराष्ट्राची अवस्था पाहून कोणीही अस्वस्थ होईल. जर महाराज आज असते, तर ते नक्कीच या परिस्थितीवर आवाज उठवले असते. हाच राग, हाच प्रामाणिक भाव मी माझ्या अभिनयातून आणण्याचा प्रयत्न केला आहे.”

प्रेक्षकांमध्ये वाढलेली उत्सुकता

टिझर प्रदर्शित झाल्यानंतर सोशल मीडियावर प्रचंड चर्चेला ऊत आला आहे. चाहत्यांच्या प्रतिक्रिया पाहता, हा चित्रपट २०२५ मधील सर्वाधिक चर्चेत राहणारा सिनेमा ठरणार असल्याचे स्पष्ट होत आहे. “इतिहास आणि वर्तमान यांचा संगम” हा चित्रपटाचा मुख्य गाभा असल्यामुळे सर्व वयोगटातील प्रेक्षक त्याकडे आकर्षित होत आहेत.

प्रदर्शित दिनांक व निर्मिती

द ग्रेट मराठा एंटरटेनमेंट, सत्य सई फिल्म्स आणि क्रिझोल्ह यांच्या संयुक्त निर्मितीत हा चित्रपट तयार करण्यात आला आहे. ३१ ऑक्टोबर रोजी झी स्टुडिओजच्या माध्यमातून ‘पुन्हा शिवाजीराजे भोसले’ प्रेक्षकांच्या भेटीस येणार आहे. महाराष्ट्राच्या इतिहासाशी जोडलेली ही नवी कहाणी समाजमनात किती खोलवर रुजते, याची उत्सुकता आता प्रचंड वाढली आहे.