नाशिकमध्ये स्टेट लेव्हल प्लेन एअर वॉटरकलर वर्कशॉपला उत्स्फूर्त प्रतिसाद

नाशिक, दि. ३० मार्च २०२६ :Nashik Art Workshop नाशिक शहरात कला आणि सर्जनशीलतेचा सुंदर संगम अनुभवायला मिळाला, जेव्हा GH Raisoni व Reliance Animation Academy, Nashik यांच्या संयुक्त विद्यमाने स्टेट लेव्हल प्लेन एअर वॉटरकलर वर्कशॉपचे आयोजन करण्यात आले. या उपक्रमाला विविध वयोगटातील कलाकारांचा उत्स्फूर्त प्रतिसाद मिळाला.

या विशेष वर्कशॉपमध्ये (Nashik Art Workshop) तब्बल ६ ते ६५ वर्षे वयोगटातील सुमारे १०८ कलाकारांनी सहभाग नोंदवला. निसर्गरम्य वातावरणात रंग, ब्रश आणि कल्पनाशक्ती यांचा सुंदर मेळ घालत सहभागी कलाकारांनी वॉटरकलर पेंटिंगचा आनंद घेतला. अनेकांसाठी हा अनुभव केवळ शिकण्यापुरता मर्यादित न राहता एक प्रेरणादायी कलाप्रवास ठरला.

कार्यक्रमादरम्यान अनुभवी आणि वरिष्ठ कलाकारांनी प्रत्यक्ष लाइव्ह डेमो सादर करून सहभागींचे मार्गदर्शन केले. विशेषतः मुंजा नरवडे आणि सुनील गवळी यांनी लँडस्केप पेंटिंगचे प्रात्यक्षिक सादर करत रंगसंगती, ब्रश टेक्निक आणि निसर्गचित्रणातील बारकावे याविषयी सविस्तर माहिती दिली. त्यांच्या मार्गदर्शनामुळे नवोदित कलाकारांना नवीन दृष्टिकोन मिळाला.या कार्यक्रमाला अविनाश काटे, प्रतिभा अहिरे-पाटील, मुंजा नरवडे, देवेंद्र पोटदुखे आणि सुनील गवळी यांसारख्या मान्यवरांची उपस्थिती लाभली. त्यांच्या उपस्थितीमुळे कार्यक्रमाची शोभा अधिकच वाढली आणि सहभागी कलाकारांमध्ये उत्साह संचारला.

संपूर्ण वर्कशॉपदरम्यान कलाकारांनी उत्साहाने सहभाग घेत विविध शैलीत चित्रनिर्मिती केली. काहींनी निसर्गचित्रे साकारली, तर काहींनी आपल्या कल्पनाशक्तीला रंगांची जोड देत वेगळे प्रयोग केले. या उपक्रमामुळे कलाकारांना केवळ तांत्रिक ज्ञानच नव्हे, तर आत्मविश्वास आणि प्रेरणाही मिळाली.कार्यक्रमाच्या शेवटी उपस्थितांनी आयोजकांचे मनापासून कौतुक केले. भविष्यातही अशा प्रकारचे उपक्रम आयोजित करण्यात यावेत, जेणेकरून नवोदित कलाकारांना योग्य व्यासपीठ मिळेल, अशी अपेक्षा सर्वांनी व्यक्त केली.