नाशिकमध्ये संततधार : गोदावरी नदीला पूर : गंगापूर धरणातून १५०० क्युसेक पाण्याचा विसर्ग 

नाशिक –जून मध्ये दडी मारून बसलेल्या पावसाने अखेर जुलैच्या पहिल्या आठवड्यात जोरदार हजेरी लावली आहे.गेल्या १२ तासांत नाशिकसह परिसरात ५६.८ मिलिमीटर पावसाची नोंद झाली आहे. त्यामुळे गोदावरीला पूर आला असून आज सकाळी १० वाजता नाशिक शहराला पाणीपुरवठा करणाऱ्या गंगापूर धरणातून नदीपात्रात १५०० क्युसेक पाण्याचा विसर्ग सुरु करण्यात आला असून तो टप्प्या टप्प्याने वाढवला जाणार असल्याचे प्रशासनाकडून सांगण्यात आले आहे.

नाशिक मध्ये मध्ये काल (दि १०) रोजी सायंकाळी साडेपाच ते साडेआठ वाजे दरम्यान ७.७ मिलिमीटर पाऊस झाला. यानंतर रात्री साडेदहा ते साडे अकरा दरम्यान ६.४ मिलिमीटर पाऊस झाला. तर रात्री साडेअकरा ते पहाटे ३५.७ मिलिमीटर पावसाची नोंद झाली.

गंगापूर धरणाच्या पाणलोट क्षेत्रात सुरू असलेल्या पावसाने धरणाच्या पाणी पातळीत वाढ होत झाली आहे. पावसाचा जोर टिकून राहिल्यास गंगापूर धरणातून टप्प्या टप्प्याने नदीपात्रात विसर्ग वाढवण्यात येईल अशी माहिती प्रशासना तर्फे देण्यात आली आहे. गंगापुर प्रकल्पाच्या मुक्त पाणलोट क्षेत्रामधुन गोदावरी नदीमधे होळकर पुलाजवळ ७००० क्युसेक्स इतका विसर्ग सुरु आहे. पाऊसचा जोर पुढचे काही दिवस असाच रहाणार  असल्याने नागरीकांनी खबरदारी घ्यावी  होळकर पुलाजवळ गोदावरी नदीत पाण्याची पातळी वाढणार असल्याने नाशिक शहरातील गोदावरी नदीकाठच्या नागरीकांनी सतर्क रहावे अशा सुचना नागरीकांना प्रशासनामार्फत देण्यात येत आहे.

पालखेड आणि चणकापूर धरणातून विसर्ग सुरु
पालखेड धरणाच्या पाणलोट क्षेत्रात सुरू असलेल्या पावसाने धरण द्वारपरिचलन पातळी (ROS) पूर्ण झाल्याने व पाण्याची आवक वेगाने वाढल्यामुळे सकाळी ९:०० वा पालखेड धरणातून विसर्ग वाढवून २०७७० क्युसेक्स विसर्ग नदीपात्रात सोडण्यात आला आहे. तर चणकापूर धरणातून आता १४६७९ क्युसेक्स विसर्ग वाढविण्यात आला आहे. पावसाचा जोर टिकून राहिल्यास टप्प्याटप्प्याने यात वाढ करण्यात येईल असे हि प्रशासनातर्फे सांगण्यात आले.

(गोदावरीला आलेल्या पुराचा व्हिडीओ पहा )