लोकचित्र संगम कलामहोत्सव तिसऱ्या चित्रप्रदर्शनाचे गुरुवारी उदघाट्न

नाशिक,दि.१२ ऑगस्ट २०२३ – वारली आर्ट फाउंडेशनतर्फे लोकचित्र संगम कलामहोत्सवाचे आयोजन करण्यात आले आहे. राज्यात प्रथमच दि. १ ते ३१ ऑगस्ट दरम्यान हा अनोखा उपक्रम नाशिकरोडच्या पु. ना. गाडगीळ शोरूममधील कलादालनात सुरु आहे. त्यात भारतातील विविध वैशिष्ट्यपूर्ण लोकचित्र शैलीतील आकर्षक कलाकृतींचा समावेश असून एकूण २५ कलाकार सहभागी झाले आहेत. संकल्पना व संयोजन पत्रकार व वारली चित्रशैली अभ्यासक संजय देवधर यांचे आहे. पहिल्या दोन्ही प्रदर्शनांना कला रसिकांचा उत्स्फूर्त प्रतिसाद मिळाला.

या मालिकेतील तिसऱ्या चित्रप्रदर्शनाचे उदघाट्न गुरुवारी (दि. १७) होणार आहे.सायंकाळी ५ वाजता या लोकचित्र संगम चित्र प्रदर्शनाचे उदघाट्न होईल. एमईटी – भुजबळ नॉलेज सिटीच्या मुख्य प्रबंधक व चित्रकर्ती डॉ.शेफाली भुजबळ,छायाचित्रकार व जनस्थान समूहाचे अध्यक्ष अभय ओझरकर आणि कर्नल मोहन आशर,कलाप्रेमी अंजू आशर आदी मान्यवर प्रमुख पाहुणे म्हणून उपस्थित रहाणार आहेत.

दि.१७ ते २३ ऑगस्ट दरम्यान होणाऱ्या या तिसऱ्या प्रदर्शनात अपूर्वा भंडारे, सुप्रिया जोशी, देविका काशीकर, स्नेहल बंकापुरे, आदिती पळसुले आणि संजय देवधर यांची विविध राज्यांच्या शैलीतील सुंदर चित्रे बघायला मिळतील. दि.२४ ते ३१ ऑगस्ट या चौथ्या व शेवटच्या प्रदर्शनात पद्मजा ओतूरकर, माधवी पाठक, श्रद्धा रावळ, निवेदिता पोतदार व स्मिता गांगल यांच्या चित्रांचा समावेश असेल. हा संपूर्ण कलामहोत्सव सर्वांसाठी विनामूल्य खुला आहे. कलारसिकांनी चित्रप्रदर्शनाला उपस्थित राहून कलाकृतींचा आस्वाद घ्यावा असे आवाहन संयोजक संजय देवधर व सर्व सहभागी कलाकारांनी केले
आहे.

‌‌‌‌‌
विविध लोकचित्रशैलींची रसिकांना मेजवानी
महाराष्ट्रातील आदिवासी वारली चित्रशैली सुपरिचित आहे. त्या खालोखाल बिहारची मधुबनी कला रसिकांना माहिती आहे. पण फारश्या माहिती नसणाऱ्या चित्रकथी,‌ लिपण, टिकुली, साओरा, गोंड, पट्टचित्र, मांडणा, फड, गुर्जरी, कलमकारी, पिछवाई, मंडला, भिल्ल, हजारीबाग, संथाळ, धुलीशिल्प, लेदर पपेट्री अशा विविध प्रांतांच्या लोकचित्र शैलींचा संगम एकाच छताखाली झालेला बघायला मिळेल. नाशिककर कलारसिकांसाठी ही अपूर्व मेजवानी आहे. येथे चित्रे अल्पदरात खरेदीही करता येतील.