पं.भानुदास पवार स्मृती ‘तालाभिषेक’ संगीत महोत्सवाचे शनिवारी आयोजन

नाशिक,२१ डिसेंबर २०२२ – गेल्या ५३ वर्षांपासून नाशिक महानगरातील संगीत क्षेत्रात तबल्याचा प्रचार आणि  प्रसार करणाऱ्या ‘पवार तबला अकादमी’  आयोजित  पं . भानुदास पवार स्मृती  संगीत महोत्सवाचे  हे २५ वे   वर्ष आहे. या निमित्ताने पवार तबला अकादमी आणि अल्पारंभ  एज्युकेशनल अँड  कल्चरल फाऊंडेशन या दोन्ही संस्थांच्या संयुक्त विद्यमाने  नाशिककरांसाठी ‘तालाभिषेक’ या संगीत महोत्सवाचे आयोजन केले गेले.

याच महोत्सवांतर्गत शनिवार दि. २४ डिसेंबर २०२२ रोजी सायं  ६ वा कुर्तकोटी शंकराचार्य न्यास  सभागृह,गंगापूर रोड येथे  भारतरत्न पं . भीमसेन जोशी यांचे नातू विराज जोशी यांचे गायन तर पंजाब घराण्याचे प्रसिद्ध तबलावादक उ. अल्लारखां साहेबांचे शिष्य पं . योगेश सम्सी यांचे एकल तबलावादन  होणार आहे.कार्यक्रमाचे उद्घाटन मराठा विद्या प्रसारक समाजचे सरचिटणीस मा.  नितीन ठाकरे यांचे हस्ते होईल.

विराज जोशी यांचे गायनाचे शिक्षण  वडील श्रीनिवास जोशी  आणि  पं.सुधाकर चव्हाण  यांच्याकडे सुरु असून  पं . भीमसेन जोशी यांच्या गायकीचा वारसा पुढे नेत  आहे. नुकत्याच संपन्न झालेल्या सवाई गंधर्व भीमसेन महोत्सवात त्यांनी  गायन सादर केले आहे. प्रसिद्ध गायक पं. दिनकर कैकिणी यांचे सुपुत्र असलेले पं. योगेश सम्सी उ. अल्लारखां साहेबांचे गंडाबंध शिष्य असून देश विदेशात स्वतंत्र तबलावादन आणि साथसंगत यासाठी त्यांचा नावलौकिक आहे.

या कार्यक्रमात विराज जोशी यांना कुणाल काळे आणि अद्वय पवार तबला ,संस्कार जानोरकर संवादिनी तर अमित भालेराव ताल वाद्यांवर साथसंगत करतील . पं. योगेश सम्सी यांना त्यांचे शिष्य  गुरुप्रसाद गांधी संवादिनी साथ करतील.

या कार्यक्रमात नाशिकमधील प्रसारभारती बी हाय ग्रेड मिळालेल्या ११ कलाकारांचा सत्कार करण्यात येणार आहे.  तसेच श्रीमती  माई लेले श्रवण विकास विद्यालयातील ३ विद्यार्थ्यांना श्रवणयंत्र वाटप करण्यात येईल.

कार्यक्रमाचे संयोजन  अल्पारंभ एज्युकेशनल  अँड कल्चरल फाउंडेशन संस्थेतर्फे करण्यात आले असून ह्या कार्यक्रमास प्रवेश सर्वांसाठी खुला आहे . तरी नाशिककर रसिकांनी या  महोत्सवाचा आस्वाद घ्यावा असे आवाहन पवार तबला अकादमीचे संचालक नितीन पवार  आणि  एस.डब्ल्यू.एस.फायनान्शिअल सोल्युशन प्रा. ली. चे संचालक रघुवीर अधिकारी यांनी केले आहे.