मुंबई,दि.६ मार्च २०२३ – बॉलिवूडचे शेहनशाह अभिनेते बिग बी अमिताभ बच्चन हे त्यांच्या आगामी ‘प्रोजेक्ट के’ या चित्रपटाच्या शूटिंगदरम्यान हैदराबादमध्ये जखमी झाले आहेत. सेटवर ॲक्शन सीन करताना बिग बींना मार लागला आणि त्यानंतर शूटिंग रद्द करावी लागली. त्यांना तातडीने हैदराबादमधील एआयजी रुग्णालयात दाखल करण्यात आलं होतं. उपचारानंतर ते मुंबईतल्या घरी परतले आहेत. मात्र त्यांना पूर्णपणे बरं होण्यासाठी काही आठवडे लागतील. बिग बींनी त्यांच्या ब्लॉगमध्ये याविषयीची माहिती दिली.
शूटिंगदरम्यान त्यांच्या उजव्या बरगडीजवळी स्नायू फाटल्याचं वृत्त आहे. ८० वर्षीय अभिनेते बच्चन यांनी एका ब्लॉग पोस्टमध्ये खुलासा केला आहे. आपल्या ब्लॉग पोस्टमध्ये अत्यावश्यक कामांसाठी थोडा मोबाइलचा आधार घेत असून अन्य वेळ विश्रांतीच घेत असल्याचं अमिताभ बच्चन यांनी सांगितलं. ‘होय, वेदनादायक’,अशा शब्दात त्यांनी झालेल्या दुखापतीचे वर्णन केलं आहे. या दुखापतीमुळे आपल्याला हालचाल करण्यास तसेच श्वासोच्छवास करताना देखील थोडा त्रास होतो असेही त्यांनी ब्लॉगमध्ये म्हटले आहे. सर्व सुरळीत होण्यासाठी काही आठवडे लागतील, असंही ते म्हणतात. तसेच चाहत्यांनी जलसा येथे नेहमीप्रमाणे भेट घेण्यासाठी जमा होऊ नये अशी विनंती करत त्यांनी पोस्ट पूर्ण केली आहे.
अमिताभ बच्चन पुढे म्हणाले, ‘मी जलसा येथे विश्रांती घेतो आणि आवश्यक कामांसाठी मोबाइल वापरतो, मात्र अधिक करून विश्रांतीच घेत आहे’.‘आज संध्याकाळी जलसा गेटवर हितचिंतकांना भेटणं अशक्य वाटत आहे किंवा मी सांगू शकत नाही. त्यामुळे चाहत्यांनी इथे येऊ नये आणि ज्यांना येण्याची इच्छा आहे त्यांना शक्य तितकी ही माहिती द्या. बाकी सर्व ठीक आहे’, असं म्हणत त्यांनी पोस्ट पूर्ण केली.
प्रोजेक्ट के मध्ये त्यांचे सह-कलाकार प्रभास, दीपिका पदुकोण आणि दिशा पटानी आहेत. हा चित्रपट पुढील वर्षी प्रदर्शित होण्याची अपेक्षा आहे.त्यांच्या या ब्लॉगनंतर सोशल मीडियावर चाहते बिग बींच्या तब्येतीविषयी काळजी व्यक्त करत आहेत. त्याचप्रमाणे ते लवकरात लवकर बरे व्हावेत यासाठी प्रार्थना करत आहेत.
