औद्योगिक क्रांतीचा नवा टप्पा : नाशिकमध्ये आयमा इंडेक्स 2025 चा आज शानदार शुभारंभ

नाशिक, दि. 27 नोव्हेंबर 2025 – AIMA Index 2025  नाशिकच्या औद्योगिक नकाशावर ऐतिहासिक ठरणारा आयमाचा औद्योगिक महाकुंभ – आयमा इंडेक्स 2025 आज शानदार सोहळ्यात सुरु होणार आहे .आधुनिक तंत्रज्ञानाचा उत्सव, उद्योजकांच्या संधींची मेजवानी आणि उद्योगजगतातील दिग्गजांची उपस्थिती यामुळे या प्रदर्शनाचे महत्त्व आणखी वाढले आहे. त्र्यंबक रोडवरील ठक्कर डोम येथे 32 हजार स्क्वेअर फूट विस्तीर्ण जागेत उभारण्यात आलेले हे चार दिवसांचे आंतरराष्ट्रीय औद्योगिक प्रदर्शन आज दि. 28 नोव्हेंबरपासून सर्वसामान्यांसाठी खुले होत आहे.

उद्योगक्षेत्रातील नव्या ट्रेंड्स, जागतिक बाजारपेठेतील संधी आणि नाविन्यपूर्ण स्टार्टअप्सना प्रोत्साहन देण्याच्या उद्देशाने आयोजित या महाकुंभाचे उद्घाटन प्रजासत्ताक दक्षिण आफ्रिकेचे भारतातील उच्चायुक्त डॉ.अनिल सुकलाल आणि उद्योग खात्याचे प्रधान सचिव पी. अन्बलगन तसेच उद्योग आयुक्त( विकास) दीपेंद्रसिंह कुशवाह,विभागीय आयुक्त प्रविण गेडाम,महाराष्ट्र औद्योगिक विकास महामंडळाचे मुख्य कार्यकारी अधिकार पी.वेलारासू,एचएएलचे मुख्य कार्यकारी अधिकारी साकेत चतुर्वेदी आणि दीपक बिल्डर्सचे अध्यक्ष दीपक चंदे आदी मान्यवरांच्या प्रमुख उपस्थितीत संपन्न होणार आहे.३२ हजार स्क्वेअर फुट इतक्या विस्तीर्ण जागेत हे प्रदर्शन विस्तारले आहे. पर्यावरणपूरक आणि नाविन्यपूर्ण असे 350 वातानुकुलित स्टॉल्स,भव्य ड्रोन शो,एआय तंत्राचा अवलंब, इलेक्ट्रिकल व्हेईकलसाठी स्वतंत्र विभाग ही या प्रदर्शनाची खास वैशिष्ट्ये आहेत.उद्योग क्षेत्रात पाऊल टाकून आपली उन्नती साधावी आणि देशाला परकीय चलन मिळवून द्यावे अशी उदयोन्मुख उद्योजकांची मनिषा असते.मात्र त्यांना त्याबाबत आवश्यक ते मार्गदर्शन आणि पाठबळ मिळत नसल्याने ते हताश होतात आणि आपले स्वप्न साकार होणार किंवा नाही याची चिंता त्यांना सतावत असते त्यांच्यासाठी हे प्रदर्शन म्हणजे एक प्रकारे पर्वणीच ठरणार आहे.

नवीन तंत्रज्ञानाचे प्रदर्शन – ड्रोन शो आणि AI विभाग ठरला खास (AIMA Index 2025)

या वर्षीच्या प्रदर्शनात ड्रोन शो, AI तंत्रज्ञानाचे डेमो, तसेच इलेक्ट्रिक वाहनांसाठी स्वतंत्र विभाग हे मुख्य आकर्षण ठरत आहेत. सुमारे 350 वातानुकुलित स्टॉल्स मध्ये देशभरातील छोटे–मोठे उद्योग, स्टार्टअप्स आणि तंत्रज्ञान क्षेत्रातील कंपन्यांनी आपली उत्पादने मांडली आहेत.AI आधारित औद्योगिक मॉडेल्स, स्मार्ट मॅन्युफॅक्चरिंग सोल्युशन्स, रोबोटिक्स आणि टिकाऊ उद्योगधोरणांवरील सादरीकरणांनी आजच्या पहिल्याच दिवशी उपस्थितांचे लक्ष वेधून घेतले.

नवोदित उद्योजकांसाठी सुवर्णसंधी

उद्योगक्षेत्रात पाय रोवण्याचे स्वप्न बाळगणाऱ्या तरुण उद्योजकांसाठी हे प्रदर्शन म्हणजे मार्गदर्शनाचा खजिना आहे. विविध शासकीय योजनांचे अधिकारी, उद्योग धोरण हाताळणारे तज्ज्ञ आणि विविध औद्योगिक संस्थांचे प्रतिनिधी प्रत्यक्ष मार्गदर्शनासाठी चारही दिवस उपस्थित राहणार आहेत.वित्तसहाय्य, कर्जसुविधा, सबसिडी धोरणे, आंतरराष्ट्रीय व्यापार संधी या सर्व बाबतीत नवोदित उद्योजकांना येथे महत्त्वपूर्ण मार्गदर्शन मिळत आहे.कोविड काळात अडचणीत सापडलेल्या लघुउद्योजकांसाठीही विशेष सत्रांची व्यवस्था आहे. उद्योगांच्या अडचणी समजून त्यावर उपाय सुचविण्यासाठी आयमातर्फे अधिकाऱ्यांसह चर्चा आयोजित करण्यात आल्या आहेत.

आयमाची 35 वर्षांची परंपरा – सातवे इंटरनॅशनल प्रदर्शन

अंबड इंडस्ट्रीज अँड मॅन्युफॅक्चरर्स असोसिएशन (आयमा) गेल्या 35 वर्षांपासून नाशिक जिल्ह्यातील औद्योगिक विकासाचे नेतृत्व करत आहे. कामगार कल्याण, उद्योजकांना प्रोत्साहन आणि सामाजिक बांधिलकी या तिन्ही बाबतीत आयमाने नेहमीच पुढाकार घेतला आहे.या संघटनेच्या उल्लेखनीय कार्यात विद्यमान अध्यक्ष ललित बूब यांचे नाव विशेषत्वाने घेतले जाते. त्यांच्या नेतृत्वाखाली संघटनेने सामाजिक उपक्रम, उद्योगवाढ आणि नव्या गुंतवणुकीस चालना देण्यात उल्लेखनीय प्रगती साधली आहे.सन 2005 पासून दर तीन वर्षांनी आयोजित होणारे आयमाचे आंतरराष्ट्रीय औद्योगिक प्रदर्शन आता सातव्या पर्वात पोहोचले आहे. जिल्ह्यातील 16 हजार उद्योग आणि 2500 हून अधिक सदस्यांच्या सहभागामुळे हे प्रदर्शन दरवेळी भव्य स्वरूपात आयोजित केले जाते.यावर्षीच्या प्रदर्शनाच्या यशस्वीतेसाठी आयमाचे उपाध्यक्ष राजेंद्र पानसरे, उमेश कोठावदे,सरचिटणीस प्रमोद वाघ,डीओपीपी चेअरमन ज्ञानेश्वर गोपाळे, आयपीपी निखिल पांचाळ,सचिव योगिता आहेर,हर्षद बेळे, कोषाध्यक्ष गोविंद झा यांच्यासह सर्व कार्यकारणी सदस्य प्रयत्नशील आहेत.

आजचे विशेष कार्यक्रम

दुपारी 2 वाजता : “नाविन्यता आणि व्यापाराच्या संधी” या विषयावर ऋषभ इन्स्ट्रुमेंट्सचे नरेंद्र गोलिया यांचे मार्गदर्शन

दुपारी 3 वाजता : सोमालिया–लेसोथो प्रतिनिधी मंडळाशी “शिव-सुसंवाद”

माझगाव डॉकचे खास मार्गदर्शन – रविवारचे विशेष सत्र

आयमा इंडेक्स 2025 चे आणखी एक महत्त्वाचे आकर्षण म्हणजे माझगाव डॉक शिप बिल्डर्स लिमिटेड (MDL) चा सहभाग.

रविवार, दि. 29 नोव्हेंबर रोजी सकाळी MDL चे महाव्यवस्थापक हरेराम सिंग आणि मुख्य व्यवस्थापक दत्तात्रय सावंत हे विक्रेते, पुरवठादार आणि भागधारकांसाठी विशेष मार्गदर्शन सत्र घेणार आहेत.जहाजबांधणी क्षेत्रातील असेंब्ली, इलेक्ट्रिकल व इलेक्ट्रॉनिक घटक, मशीनरी, पाईपिंग, लिफ्टिंग उपकरणे यांसारख्या महत्त्वाच्या घटकांच्या पुरवठा साखळीत सहभागी होण्यासाठी इच्छुकांसाठी हे एक मोठे प्लॅटफॉर्म ठरणार आहे.

नाशिकच्या उद्योगविश्वात नवीन पर्व

आयमा इंडेक्स 2025 मुळे नाशिकला राष्ट्रीय आणि आंतरराष्ट्रीय औद्योगिक क्षेत्रात नवे स्थान मिळणार असल्याचे तज्ज्ञांचे मत आहे. उद्योग वाढ, नवनवीन गुंतवणूक, रोजगार निर्मिती आणि तंत्रज्ञानातील प्रगती यासाठी हे प्रदर्शन एक महत्त्वाचा टप्पा ठरणार आहे.