३२ तासांच्या प्रतीक्षेनंतर मुंबई–पुणे द्रुतगती महामार्गावरील वाहतूक पूर्ववत

मुंबई, दि. ५ फेब्रुवारी २०२६ – Mumbai Pune Expressway मुंबई–पुणे द्रुतगती महामार्गावर खोपोलीजवळील आडोशी बोगद्याच्या परिसरात मंगळवारी (दि. ३ फेब्रुवारी) सायंकाळी झालेल्या भीषण टँकर अपघातामुळे निर्माण झालेली वाहतूक कोंडी अखेर तब्बल ३२ तासांनंतर संपुष्टात आली. अत्यंत ज्वलनशील प्रोपोलिन गॅस वाहतूक करणारा टँकर उलटल्याने महामार्गावर भीषण परिस्थिती निर्माण झाली होती. सुरक्षेच्या कारणास्तव महामार्गासह जुना पुणे–मुंबई मार्गही तात्काळ बंद करण्यात आला होता. या दीर्घकाळ चाललेल्या कोंडीत अडकलेल्या हजारो प्रवाशांना प्रचंड त्रास सहन करावा लागला.

अपघातानंतर टँकरमधून मोठ्या प्रमाणावर गॅस गळती सुरू झाल्याने प्रशासनाने मुंबईकडे जाणारी वाहतूक पूर्णपणे थांबवली होती. परिस्थिती नियंत्रणात येईपर्यंत कोणताही धोका टाळण्यासाठी अग्निशमन दल, आपत्ती व्यवस्थापन पथक, पोलीस प्रशासन तसेच तज्ज्ञ पथक घटनास्थळी तैनात करण्यात आले. गॅस गळती थांबवण्यासाठी आणि टँकर हटवण्यासाठी अत्यंत काळजीपूर्वक कार्यवाही करण्यात आली.

या अपघातामुळे महामार्गावर (Mumbai Pune Expressway)तब्बल २५ किलोमीटरपर्यंत वाहनांच्या रांगा लागल्या होत्या. अनेक प्रवासी तासनतास वाहनांत अडकून पडले होते. या कोंडीत रुग्ण, ज्येष्ठ नागरिक, लहान मुले, महिला आणि रोजच्या प्रवासासाठी निघालेले नोकरदार यांना मोठ्या मानसिक आणि शारीरिक त्रासाला सामोरे जावे लागले. पिण्याचे पाणी, अन्न आणि स्वच्छतागृहांच्या अभावामुळे परिस्थिती अधिकच बिकट झाली होती.

दरम्यान, या घटनेची गंभीर दखल मुख्यमंत्री देवेंद्र फडणवीस यांनी घेतली असून, संपूर्ण प्रकरणाचा सविस्तर अहवाल मागवण्यात आला आहे. भविष्यात अशा घटना टाळण्यासाठी आणि आपत्कालीन व्यवस्थापन अधिक सक्षम करण्यासाठी आवश्यक उपाययोजना करण्याचे निर्देश त्यांनी दिले आहेत.

प्रशासनाकडून प्रथम टप्प्यात काल सायंकाळी एकेरी वाहतूक सुरू करण्यात आली होती. त्यानंतर टँकर पूर्णपणे हटवून गॅस गळतीवर नियंत्रण मिळवल्यानंतर रात्री उशिरा दोन्ही मार्गांवरील वाहतूक सुरळीत सुरू करण्यात आली. ३२ तासांच्या प्रतीक्षेनंतर महामार्ग खुला झाल्याने अडकलेल्या प्रवाशांनी सुटकेचा श्वास घेतला.

या संकटाच्या काळात राज्याच्या उपमुख्यमंत्री सुनेत्रा पवार यांनी संवेदनशीलतेने परिस्थिती हाताळत तात्काळ मदतीचे निर्देश दिले. तहानलेल्या आणि उपाशी प्रवाशांच्या मदतीसाठी त्यांनी प्रशासनाला आणि पक्ष कार्यकर्त्यांना तत्काळ हालचाली करण्यास सांगितले. त्यांच्या निर्देशानुसार अडकलेल्या प्रवाशांसाठी पिण्याचे पाणी, नाश्ता आणि आवश्यक प्राथमिक मदतीची व्यवस्था करण्यात आली.

ही मदत राष्ट्रवादी काँग्रेसच्या नेत्या, माजी नगरसेविका आणि स्थायी समितीच्या माजी अध्यक्षा सीमा ताई सावळे यांच्या माध्यमातून थेट घटनास्थळी पोहोचवण्यात आली. सीमा ताई सावळे स्वतः घटनास्थळी उपस्थित राहून प्रवाशांची आपुलकीने विचारपूस करत होत्या. संकटात सापडलेल्या नागरिकांना धीर देत त्यांनी मानसिक आधार दिला. त्यांच्या तत्परतेमुळे आणि व्यवस्थापनामुळे अडकलेल्या प्रवाशांना मोठा दिलासा मिळाला.

या अपघाताचा फटका सार्वजनिक वाहतुकीलाही बसला. पुण्याहून मुंबईकडे जाणाऱ्या सर्व एसटी बस फेऱ्या तात्पुरत्या स्वरूपात रद्द करण्यात आल्या होत्या. मुंबई सेंट्रल, दादर, ठाणे आणि बोरीवलीकडे जाणाऱ्या एसटी बसेस बंद ठेवण्याचा निर्णय एसटी प्रशासनाने वाहतूक कोंडीच्या पार्श्वभूमीवर घेतला होता. महामार्ग खुला झाल्यानंतर हळूहळू एसटी सेवा पूर्ववत करण्यात येत आहे.

प्रोपोलिन गॅससारख्या अत्यंत ज्वलनशील पदार्थांची वाहतूक करताना आवश्यक सुरक्षात्मक उपाययोजना किती महत्त्वाच्या आहेत, हे या अपघातातून पुन्हा एकदा स्पष्ट झाले आहे. प्रशासन, वाहतूक यंत्रणा आणि आपत्ती व्यवस्थापन पथकांच्या समन्वयामुळे मोठी जीवितहानी टळली असली तरी प्रवाशांना भोगाव्या लागलेल्या हालअपेष्टा गंभीर विचार करण्यास भाग पाडणाऱ्या आहेत.

एकीकडे ३२ तासांच्या संघर्षानंतर महामार्गावरील वाहतूक पूर्ववत झाली असली, तरी या घटनेने आपत्कालीन परिस्थितीत जलद निर्णय, प्रभावी समन्वय आणि प्रवाशांसाठी तत्काळ मदतीची गरज अधोरेखित केली आहे. उपमुख्यमंत्री सुनेत्रा पवार यांच्या संवेदनशील नेतृत्वाखाली आणि सीमा ताई सावळे यांच्या तत्पर कार्यामुळे संकटाच्या काळात मानवतेचे दर्शन घडले, अशी भावना अनेक प्रवाशांनी व्यक्त केली.