नाशिकच्या उद्योजकांना दक्षिण आफ्रिकेत गुंतवणुकीची मोठी संधी- उच्चायुक्त सुकलाल

नाशिक,दि,२८ नोव्हेंबर २०२५ – AIMA Index 2025 क्रिकेट आणि व्यापार संबंधातून भारत आणि दक्षिण आफ्रिका यांच्या दरम्यानचे संबंध दिवसेंदिवस वृद्धिंगत होत असून नाशिकच्या गुंतवणूकदारांसाठी दक्षिण आफ्रिकेची दारे सतत खुली आहेत.नाशिकचे उद्योजक तेथे आपल्या कार्याचा ठसा उमटू शकतात,असे प्रतिपादन दक्षिण आफ्रिकेचे भारतातील उच्चायुक्त अनिल सुकलाल यांनी केले.

अंबड इंडस्ट्रीज अँड मॅन्युफॅक्चरर असोसिएशन (आयमां) तर्फे त्र्यंबक रोडवरील ठक्कर डोम येथे चार दिवसांचे आंतरराष्ट्रीय प्रदर्शन (औद्योगिक महाकुंभ) आयोजित करण्यात आले असून त्याचे उद्घाटन शानदार सोहळ्याने दक्षिण आफ्रिकेचे भारतातील उच्चयुक्त अनिल सुकलाल आणि उद्योग आयुक्त(विकास) दीपेंद्रसिंह कुशवाह यांच्या प्रमुख उपस्थितीत झाले त्यावेळी उपस्थितांना मार्गदर्शन करताना सुकलाल बोलत होते.

(AIMA Index 2025) व्यासपीठावर आयमाचे अध्यक्ष ललित बूब, आयमा इंडेक्स 2025चे चेअरमन वरूण तलवार, जिल्हाधिकारी आयुष प्रसाद, एमआयडीसीचे सह मुख्य कार्यकारी अधिकारी अजित कुंभार, एचएएलचे मुख्य कार्यकारी अधिकारी साकेत चतुर्वेदी, दक्षिण आफ्रिकेच्या उच्चायुक्तालयातील विपणन अधिकारी सोनू प्रभाकर, सोमालियाच्या दुतावासातील कौन्सिलर अब्दीरिसाक सैदनुर,जीटीटीसीआयचे संस्थापक अध्यक्ष गौरव गुप्ता, तैत्रा(मुंबई)चे संचालक विक लीन,समीर खले,अभिषेक नायर दीपक बिल्डर्सच्या संचालिका वेदश्री चंदे, निमाचे अध्यक्ष आशीष नहार,आयमाचे उपाध्यक्ष राजेंद्र पानसरे,उमेश कोठावदे,सरचिटणीस प्रमोद वाघ,बीओपीपी चेअरमन ज्ञानेश्वर गोपाळे, आयपीपी निखिल पांचाळ,सचिव हर्षद बेळे,योगिता आहेर,कोषाध्यक्ष गोविंद झा,सुरज आव्हाड,नागेश पिंगळे, अभिषेक व्यास,जगदीश पाटील, रवी महादेवकर,श्वेता चांडक, मनीष रावल,दिलीप वाघ,आदी होते.

भारत आणि दक्षिण आफ्रिका यांचे परस्पर संबंध दीर्घ काळापासून सौहार्दाचे असल्याचे सांगून सुकलाल यांनी महात्मा गांधी यांच्या दक्षिण आफ्रिकेतील वास्तव्याची आठवण करून दिली.कठीण काळातही भारत दक्षिण आफ्रिकेच्या पाठीशी खंबीरपणे उभा होता यावरून उभय देशांचे परस्पर संबंध  किती घानिष्ठ आहेत याची प्रचिती येते.भारत आणि दक्षिण आफ्रिका उद्योग क्षेत्रात परस्पर सहकार्य वाढवित आहेत.नाशिककरांना दक्षिण आफ्रिकेत कृषी,फूड प्रोसेसिंग व अन्य क्षेत्रात गुंतवणूक करण्याची मोठी संधी असून त्याचा सर्वांनी लाभ घ्यावा, असे कळकळीचे आवाहन करून त्यांनी आयमाच्या गुंतवणूक महा कुंभाचे तोंडभरून कौतुक केले.

औद्योगिक विकासाच्या क्षेत्रात महाराष्ट्राने गरुडझेप घेतली आहे.थेट गुंतवणुकीच्या बाबतीतही महाराष्ट्र अग्रेसर असल्याचे सांगून त्यांनी त्याबाबतची आकडेवारी सादर करून पाहुण्यांना चकित केले. महाराष्ट्रात गुंतवणूक करणाऱ्यांना आम्ही आवश्यक त्या सर्व सुविधा उपलब्ध करून देण्यासाठ प्रयत्नशील असतो असे नमूद करून महाराष्ट्र हे देशाच्या विकासाचे महत्वपूर्ण इंजिन असल्याचे एमआयडीसीचे सहमुख्य कार्यकारी अधिकारी अजित कुंभार यांनी आपल्या मनोगतात सांगितले. नाशकातील विकासाचा दर सातत्याने वाढत आहे. तसेच येथे सर्व सोयी सुविधा उपलब्ध असल्याने नाशकात गुंतवणूकदारांचे स्वागतच आहे, असे जिल्हाधिकारी आयुष प्रसाद यांनी आपल्या भाषणात सांगितले.एचएएलचे मुख्य कार्यकारी अधिकारी साकेत चतुर्वेदी यांनी संरक्षण क्षेत्रात एचएएलचे महत्व किती अगाध आहे हे सांगताना विविध उपक्रमांची माहिती दिली.

आयमाचे अध्यक्ष ललित बूब यांनी आपल्या प्रास्ताविक भाषणात आयमाचा इतिहास नमूद करून औद्योगिक महा कुंभाचे महत्त्व विशद केले.नाशकात मोठ्या प्रमाणात गुंतवणूक आणणे, उदयोन्मुख उद्योजकांना प्रोत्साहन देऊन त्यांना मुख्य प्रवाहात आणणे, नाशकातील निर्यातीचा टक्का वाढविणे हे आमचे प्रमुख ध्येय असल्याचे सांगून या महाकुंभामुळे नाशिकच्या औद्योगिक विकासाला निश्चित चालना मिळेल, असा विश्वासही त्यांनी व्यक्त केला. सरचिटणीस प्रमोद वाघ यांनी आभार मानले. आयमाचे नाशकात औद्योगिक प्रदर्शन सुरू झाले आणि शुभारंभाच्या दिवशीच पंधरा गुंतवणूकदारांनी 1332 कोटींच्या गुंतवणुकीची घोषणा केल्याने हे शुभसंकेतच म्हणावे लागेल, असे आयोजकांनी सांगितले.या सर्व गुंतवणूकदारांचा प्रमुख पाहुण्यांच्या हस्ते सत्कार करण्यात आला.

कार्यक्रमास आयमा संस्थापक भास्कर कोतवाल,माजी अध्यक्ष रमेश पवार,बिपीन बटाविया, जे.आर.वाघ, धनंजय बेळे, संदीप सोनार, विवेक पाटील, राजेंद्र अहिरे, अविनाश मराठे, जयदीप अलिमचंदानी,जगदीश पाटील,हेमंत खोंड,रवींद्र झोपे,अविनाश बोडके,राहुल गांगुर्डे,जयंत पगार, कुंदन डरंगे,धीरज वडनेरे,अभिषेक व्यास श्रीलाल पांडे,अजय यादव, रवी शामदासांनी,विनोद कुंभार,अलोक कानांनी, करणसिंग पाटील,रणजित सानप सुमित तिवारी,कमलेश उशीर,वेदांत राठी,मनोज मुळे,चेंबरचे संजय सोनवणे नाइसचे रमेश वैश्य, निवेकचे मंगेश पाटणकर, विविध असोसिएशनचे अधिकारी व शासकीय अधिकारी उपस्थित होते.