‘शिक्कामोर्तब’ नाटकातून कांचन पगारे यांचे रंगभूमीवर दमदार पुनरागमन

मुंबई,दि,१५ जून २०२६ – Kanchan Pagare Marathi Theatre मराठी आणि हिंदी मनोरंजन विश्वात आपल्या सहजसुंदर अभिनयाने वेगळी ओळख निर्माण करणारे लोकप्रिय अभिनेते कांचन पगारे पुन्हा एकदा रंगभूमीवर झळकण्यासाठी सज्ज झाले आहेत. छोट्या पडद्यापासून मोठ्या पडद्यापर्यंत आपल्या अभिनयाची छाप उमटवणाऱ्या कांचन पगारे यांची आता ‘शिक्कामोर्तब’ या नव्या कोऱ्या नाटकातून दमदार रंगमंचीय पुनरागमन होत आहे. या नाटकात ते ‘मजनू’ नावाच्या एका बंगाली व्यक्तीची भूमिका साकारत असून त्यांच्या या नव्या अवताराची सध्या नाट्यरसिकांमध्ये मोठी चर्चा रंगली आहे.

‘तरंगिणी एंटरटेनमेंट’ आणि ‘नवनीत’ यांच्या निर्मितीत साकारलेल्या या नाटकाचे लेखन व दिग्दर्शन प्रमोद शेलार यांनी केले आहे. नातेसंबंध, प्रेम, विश्वास आणि त्यावरील अधिकृत शिक्क्याची गरज या विषयावर आधारित असलेले हे नाटक विनोदाच्या माध्यमातून प्रेक्षकांना विचार करायला भाग पाडते.

बंगाली पात्रासाठी घेतली विशेष मेहनत (Kanchan Pagare Marathi Theatre)
‘मजनू’ ही व्यक्तिरेखा साकारताना कांचन पगारे यांनी विशेष मेहनत घेतली आहे. बंगाली व्यक्तीची देहबोली, बोलण्याची शैली आणि बंगाली ढंगाची मराठी भाषा आत्मसात करण्यासाठी त्यांनी दीर्घ काळ अभ्यास केला. या भूमिकेला वास्तववादी स्पर्श देण्यासाठी त्यांनी केलेली मेहनत रंगमंचावर स्पष्टपणे दिसून येते.

नाटकातील त्यांच्या संवादफेकीचा अंदाज, विनोदी टायमिंग आणि भावनिक प्रसंगांमधील नैसर्गिक अभिनय प्रेक्षकांना खिळवून ठेवतो. ‘मजनू’ हे पात्र केवळ विनोदी नसून त्यामध्ये अनेक भावनिक छटा असल्यामुळे ही भूमिका कांचन पगारे यांच्या अभिनय कारकिर्दीतील एक वेगळा टप्पा ठरणार असल्याचे मानले जात आहे.

सागर कारंडेंसोबत रंगणार भन्नाट जुगलबंदी
या नाटकात कांचन पगारे यांच्यासोबत लोकप्रिय अभिनेता सागर कारंडे, अभिनेत्री स्नेहा पराडकर आणि भक्ती रत्नपारखी यांच्याही महत्त्वपूर्ण भूमिका आहेत. विशेष म्हणजे सागर कारंडे आणि कांचन पगारे यांची रंगमंचावरील केमिस्ट्री हे नाटकाचे मोठे आकर्षण ठरत आहे.

दोन्ही कलाकारांच्या संवादांमधून निर्माण होणारा विनोद,प्रसंगांची मांडणी आणि त्यांची अभिनयातील जुगलबंदी प्रेक्षकांना खळखळून हसवते. त्याचबरोबर स्नेहा पराडकर यांनी साकारलेली करारी वकील आणि भक्ती रत्नपारखी यांची ‘लैला’ ही भूमिका कथानकाला अधिक रंगतदार बनवते.

नात्यांवर ‘शिक्कामोर्तब’ करण्याची भन्नाट कथा
‘शिक्कामोर्तब’ हे नाटक एका जोडप्याच्या आयुष्यात अचानक आलेल्या दुसऱ्या जोडप्यामुळे निर्माण होणाऱ्या गोंधळाभोवती फिरते.या गोंधळातून नात्यांवर अधिकृत शिक्का असणे किती महत्त्वाचे आहे, हा संदेश विनोदी आणि हलक्याफुलक्या शैलीत प्रेक्षकांपर्यंत पोहोचवण्यात आला आहे.दिग्दर्शक प्रमोद शेलार यांनी विनोद आणि सामाजिक आशय यांचा सुरेख मिलाफ साधला असून त्यामुळे हे नाटक सर्व वयोगटातील प्रेक्षकांना भावणारे ठरत आहे.

तांत्रिक बाजूही ठरतेय जमेची
अभिनयासोबतच नाटकाची तांत्रिक बाजूही तितकीच प्रभावी आहे. नेपथ्यकार संदेश बेंद्रे यांनी उभारलेले आलिशान घर कथानकाला वास्तववादी स्वरूप देते. शीतल तळपदे यांची प्रकाशयोजना आणि अभिजित पेंढारकर यांचे संगीत नाटकाचा प्रभाव अधिक वाढवते.तर निर्मिती प्रमुख म्हणून महेंद्र खराडे यांनी संपूर्ण निर्मितीची जबाबदारी यशस्वीपणे सांभाळली आहे.

रंगभूमीशी पुन्हा जुळलेले नाते
चित्रपट, मालिका आणि विविध माध्यमांमध्ये यश मिळवल्यानंतरही रंगभूमीशी असलेले नाते कायम ठेवण्याची कांचन पगारे यांची भूमिका अनेक कलाकारांसाठी प्रेरणादायी ठरत आहे. प्रसिद्धीपेक्षा कलेवरील प्रेम आणि अभिनयातील प्रामाणिकपणा जपत त्यांनी पुन्हा रंगमंचाची वाट निवडली आहे.

‘शिक्कामोर्तब’मधील त्यांचा ‘मजनू’ प्रेक्षकांना हसवतानाच विचार करायलाही भाग पाडणार आहे. त्यामुळे या नाटकाकडे नाट्यरसिकांचे विशेष लक्ष लागले असून कांचन पगारे यांच्या या नव्या प्रवासाला रसिकांचा भरभरून प्रतिसाद मिळेल, अशी अपेक्षा व्यक्त केली जात आहे.